भेनस बनिनन् टेनिसमा एकलतर्फ खेल जित्ने दोस्रो सबैभन्दा पाको उमेरकी खेलाडी

काठमाडौं। भेनस विलियम्स व्यावसायिक टेनिसमा टुर–लेभल एकलतर्फ खेल जित्ने दोस्रो सबैभन्दा पाको उमेरकी महिला बनेकी छन्। 

सात पटककी ग्रान्ड स्लाम च्याम्पियन भेनसले ४५ वर्षको उमेरमा डीसी ओपन टेनिस प्रतियोगितामा आफूभन्दा २२ वर्ष जुनियर पेटन स्टर्न्सलाई ६–३, ६–४ ले पराजित गरेकी हुन्। भेनसभन्दा जेठी मार्टिना नवरातिलोभाले मात्र महिला एकलमा खेल जितेकी छिन्। नवरातिलोभाले अन्तिम पटक २००४ मा ४७ वर्षको उमेरमा एकल खेल जितेकी थिइन्।

खेलपछि भेनसले भनिन्, ‘मलाई आफैंमा आत्मविश्वास थियो। गत हप्ता पनि म सोचिरहेको थिएँ कि मलाई मेरो खेलमा सुधार गर्नुपर्छ। यो पूर्ण दिमागी खेल हो।’ भेनसले एक वर्षभन्दा बढी समयपछि कुनै पनि प्रतियोगितामा पहिलोपल्ट भाग लिएकी हुन्। यसअघि उनले डबल्स खेल जितेर उत्कृष्ट पुनरागमन गरेकी थिइन्। 

भेनसको इच्छा कान्छी बहिनी सेरेना विलियम्स पनि पुनरागमन गरोस् भन्ने छ। ‘म मेरो टोलीलाई भनिरहेकी छु कि यदि उनी यहाँ भएकी भए धेरै राम्रो हुने थियो। हामीले सुरुदेखि नै सँगै धेरै काम गरेका छौं र त्यसैले म उनलाई पक्कै पनि सम्झन्छु,’ उनले मुस्कुराउँदै भनिन्।

हालै सामाजिक सञ्जालमा सेरेनाको एउटा भिडियो भाइरल भएको छ। उक्त भिडियमा उनी र्‍याकेट घुमाउँदै गरेको देखिन्छिन्। सेरेना ४३ वर्षकी भइन् र २०२२ मा यूएस ओपन पछि कुनै पनि खेल खेलेकी छैनन्। 

यसपछि उनले सन्न्यासको घोषणा गरिन्। उनले लामो समयसम्म टेनिसमा प्रभुत्व जमाइन्। यस अवधिमा उनले भेनससँग २३ ग्रान्ड स्लाम एकल उपाधि र १४ डबल्स उपाधि जितेकी छन्।