१४ वर्षमा १३औं बुन्डेसलिगा उपाधितर्फ बायर्न
काठमाडौं। ह्यारी केनले फेरि गोल गरे। उनको यो गोलसँगै बायर्न म्युनिख शनिबार युनियन बर्लिनलाई ४–० ले हराउँदै १४ वर्षमा १३औं बुन्डेसलिगा उपाधितर्फ थप नजिक पुगेको छ।
केनले दोस्रो हाफमा गोल गर्दै आफ्नो लिग गोल संख्या ३१ पुर्याए। अब उनलाई रोबर्ट लेवान्डोव्स्कीको एक सिजनमा बनाएको ४१ गोलको कीर्तिमान बराबरी गर्न अझै सात खेल बाँकी छन्।
सर्ज ग्नाब्रीले दुई गोल गरे भने माइकल ओलिसेले पनि एक गोल थपे। २७ खेलपछि बायर्नको कुल गोल संख्या ९७ पुगेको छ। यसले १९७१–७२ मा बायर्नले बनाएको १०१ गोलको सिजन रेकर्ड तोड्ने सम्भावना देखिएको छ।
‘यो रेकर्ड टुट्छ,’ बायर्नका खेल निर्देशक क्रिस्टोफ फ्रायन्डले भने। मिडफिल्डर अलेक्सान्दार पाभ्लोभिच अन्तिम समयमा हिपको समस्याका कारण टिमबाट बाहिरिए।
त्यस्तै, निलम्बनका कारण निकोलस ज्याक्सन, लुइस डियाज र जोनाथन टाह खेल्न पाएनन् भने जमाल मुसियाला, अल्फोन्सो डेभिस र नियमित गोलरक्षक म्यानुएल नोयर घाइते थिए। बायर्नका प्रशिक्षक भिन्सेन्ट कोम्पानीले बेन्चमा केही युवा खेलाडीहरूलाई अवसर दिएका थिए।
यस जितसँगै बायर्न बुन्डेसलिगामा बोरुसिया डर्टमुन्डभन्दा ९ अंकले अगाडि रहेको छ। ‘हामी अहिले त्यही ठाउँमा छौं जहाँ हामी हुन चाहन्छौं,’ कोम्पानीले अर्को महिना रियल मड्रिडसँग हुने च्याम्पियन्स लिग खेलअघि भने।
