नयाँ प्रशिक्षकको आगमनमा मोरक्कोको खराब सुरुआत

काठमाडौं। मोरक्कोले नयाँ प्रशिक्षक मोहम्मद उवाहबीको नेतृत्वमा आफ्नो पहिलो खेलमा शुक्रबार इक्वेडरसँग १–१ को बराबरी खेल्यो।

विश्वकपको तयारीस्वरुप भएका मैत्रीपूर्ण खेलहरूमा अफ्रिकी टोलीहरूले मिश्रित नतिजा दिएका छन्। उवाहबीले यसै महिना वालिद रेग्रागुईलाई प्रतिस्थापन गरेका हुन्। मड्रिडमा भएको खेलमा जोन येबोआले ४८औं मिनेटमा गोल गर्दै इक्वेडरलाई अग्रता दिलाएका थिए। तर, खेलको अन्त्यतिर निल एल आयनाउईले ८८औं मिनेटमा हेडरमार्फत गोल गर्दै मोरक्कोलाई बराबरी दिलाए।

उत्तरी अफ्रिकाका अन्य टोलीहरूले भने राम्रो प्रदर्शन गरे। अल्जेरिया र इजिप्टले प्रभावशाली जित निकाले भने घानाको कमजोर प्रदर्शनले चिन्ता बढाएको छ।

अल्जेरियाले इटालीको जेनोआमा ग्वाटेमालामाथि ७–० को फराकिलो जित निकाल्यो। चोटका कारण अघिल्लो प्रतियोगिता गुमाएका अमिन गुइरीले दुई गोल गरे र एक पेनाल्टी जिते। यसलाई रियाद महरेजले गोलमा परिणत गरे। रक्षक अशरफ अबादाको लामो दूरीको सानदार गोल खेलको आकर्षण बन्यो।

यस्तै, इजिप्टले जेद्दाहमा साउदी अरेबियालाई ४–० ले पराजित गर्‍यो। मोहम्मद सलाह बिना खेले पनि ओमार मरमूशले गोल गर्दै टोलीको जितमा योगदान दिए।

तर, घानाका लागि अवस्था चिन्ताजनक देखिएको छ। भियनामा अस्ट्रियाविरुद्ध ५–१ को भारी हार बेहोरेको घानाले खेलको सुरुमै पेनाल्टी दिएपछि दबाबमा परेको थियो। कप्तान जोर्डन आयूले अन्त्यतिर एक गोल फर्काए पनि अस्ट्रियाले थप दुई गोल गर्दै जित पक्का गर्‍यो। अब घानाले स्टुटगार्टमा जर्मनीसँग खेल्नेछ।

दक्षिण अफ्रिकाले डरबनमा पनामासँग १–१ को बराबरी खेल्यो। प्रशिक्षक ह्युगो ब्रूसले टोलीको प्रदर्शनप्रति सन्तुष्टि व्यक्त गरे। पनामाका योएल बार्सेनासले पहिलो हाफमा अग्रता दिलाए भने ओस्विन अपोलिसले दोस्रो हाफमा बराबरी गोल गरे।

अन्य खेलमा केप भर्डेले न्युजिल्यान्डमा भएको खेलमा चिलीसँग ४–२ ले हार्‍यो। विश्वकपमा छनोट हुन नसके पनि क्यामरुन र नाइजेरियाजस्ता टोलीहरू अभ्यास खेलका लागि भने व्यस्त छन्। अस्ट्रेलियाले सिड्नीमा क्यामरुनलाई १–० ले हरायो, जहाँ जोर्डन बोसले निर्णायक गोल गरे।

त्यस्तै, नाइजेरियाले टर्कीको अन्ताल्यामा इरानलाई २–१ ले हरायो। खेलमा मोसेस सिमोन र अकोर एडाम्सले गोल गरे।