चर्च ब्वाइजलाई स्तब्ध पार्दै सम्राट फाइनलमा

विराटनगर। घरेलु टोली सम्राट स्पोर्टिङ क्लब ३८औं संस्करणको विराट गोल्डकपको फाइनलमा प्रवेश गरेको छ।

सहिद मैदानमा बिहीबार भएको अन्तिम सेमिफाइनलमा ‘ए’ डिभिजन टोली चर्च बोइज युनाइटेडलाई ३–० ले पराजित गर्दै सम्राटले उपाधि भिडन्त पक्का गरेको हो।

पहिलो पटक विराट गोल्डकपमा सहभागिता जनाएको सम्राटले डेब्युमै फाइनल पुग्ने सफलता हात पारेको छ। अब शनिबार हुने उपाधि भिडन्तमा सम्राटले झापा–११ को सामना गर्नेछ।

सम्राटको जितमा सौरभ तामाङ, आदित्य शाक्य र विवेक राईले १–१ गोल गरे। खेलको ‘प्यलेर अफ दी म्याच’ सम्राटका सौरभ तामाङ घोषित भए। उनले नगद ११ हजार रुपैयाँ पाए।

५०औं मिनेटमा सौरभले गोल गर्दै घरेलु टोलीलाई सुरुआती अग्रता दिलाएका थिए। निर्धारित ९० मिनेटको खेल सकिएपछि थपिएको ७ मिनेटको इन्जुरी समयमा सम्राटले थप दुई गोल गर्दै जित सुनिश्चित गर्‍यो।

इन्जुरी समयको चौथो मिनेटमा आदित्यले गोल गर्दै टोलीको अग्रता दोब्बर बनाए। त्यसको दुई मिनेट बित्न नपाउँदै इन्जुरी समयको छैटौं मिनेटमा विवेक राईले गोल गरेपछि सम्राट ३–० ले विजयी भयो।