जर्मन कपको फाइनलमा बायर्न र स्टुटगार्ड भिड्ने
काठमाडौं। ११९औं मिनेटमा टियागो टोमासले गरेको सानदार ब्याकहिल गोलसँगै स्टुटगार्ट जर्मन कपको फाइनलमा पुगेको छ। यससँगै टोलीले आफ्नो उपाधि रक्षा यात्रा जारी राखेको छ।
बिहीबार राति सम्पन्न खेलमा फ्राइबर्गलाई अतिरिक्त समयमा २–१ ले पराजित गर्दै टोलीले अब मे २३ मा बर्लिनमा हुने फाइनलमा स्टुटगार्टले बायर्न म्युनिखको घरेलु डबल जित्ने लक्ष्यलाई रोक्ने प्रयास गर्नेछ।
यदि भिन्सेन्ट कोम्पानीको टोलीले च्याम्पियन्स लिग पनि जित्यो भने त्यो ट्रेबल (तीन उपाधि) बन्न सक्छ। स्टुटगार्टका लागि लगातार दुई फाइनल खेल्नु निकै फरक छन्। गत वर्ष तेस्रो डिभिजनको आर्मिनिया बिलेफेल्डजस्तो कमजोर टोलीलाई हराएर उपाधि जितेको थियो भने यसपटक कीर्तिमानी बायर्नसँग खेल्नुपर्नेछ। बायर्नले गत साता स्टुटगार्टलाई ४–२ ले हराएको थियो।
स्टुटगार्टका स्ट्राइकर डेनिज उन्डाभले भने,‘यो निकै कठिन प्रश्न हो। हामीले ध्यान केन्द्रित गर्नुपर्छ र सकेसम्म कम गल्ती गर्नुपर्छ। तर, बर्लिनमा जे पनि हुन सक्छ। यो एकै खेल हो।’
फ्राइबर्गको डबल जित्ने सपना भने यहीँ समाप्त भएको छ। तर, टोली अझै युरोपा लिगको उपाधिका लागि प्रतिस्पर्धामा छ र सेमिफाइनलमा पुगेको छ।
खेल पेनाल्टी सुटआउटतर्फ जाँदै गर्दा टोमासले व्यक्तिगत कौशल प्रदर्शन गर्दै दुई डिफेन्डरबीच हावामा घुमेर बद्रेदिन बुआनानीको पासलाई हिलले गोलमा परिणत गरे। उनले उत्कृष्ट गोलकिपर फ्लोरियन मुलरलाई छक्याउँदै निर्णायक गोल गरे।
गोलपछि टोमासले जर्सी खोलेर कर्नर फ्ल्याग उठाउँदै उत्सव मनाए। फ्राइबर्गले बराबरी गोलको प्रयास जारी राख्यो। अन्तिमतिर गोलकिपर मुलर पनि आक्रमणमा अघि बढेका थिए। तर, सफल हुन सकेनन्।
टोमासले भने,‘के भयो भनेर शब्दमा बयान गर्न गाह्रो छ। यो जीवनभर सम्झिने रात हो।’ यसअघि खेलको २८औं मिनेटमा म्याक्सिमिलियन एगेस्टाइनले म्याथियास गिन्टरको हेडरलाई गोलमा परिणत गर्दै फ्राइबर्गलाई अग्रता दिलाएका थिए। त्यसपछि स्टुटगार्टले ७०औं मिनेटमा काउन्टर अट्याकमार्फत उन्डाभको गोलबाट बराबरी गर्यो। यो उनको सिजनको २४औं गोल थियो।
उन्डाभले त्यसपछि अवसर सिर्जना गर्दै टोलीलाई नियन्त्रणमा ल्याए। तर, मुलरको उत्कृष्ट बचाउका कारण खेल प्रतिस्पर्धात्मक रह्यो। बायर्नले बुधबार बायर लेभरकुसेनलाई २–० ले हराउँदै २०२० पछि पहिलो पटक फाइनलमा स्थान बनाएको हो।
कप विजेताले युरोपा लिगमा स्थान पाउने छ। तर, स्टुटगार्ट बुन्डेसलिगामार्फत नै च्याम्पियन्स लिगका लागि छनोट हुने सम्भावना छ। यस्तो भएमा त्यो स्थान सम्भवतः लिग तालिकाबाट अर्को टोलीले पाउनेछ।
