रियललाई धक्का

काठमाडौं। रियल मड्रिडको ला लिगा जित्ने सम्भावना पहिले नै कमजोर छ। यो सम्भावनामा पनि थप धक्का लागेको छ। शुक्रबार भएको रोमाञ्चक खेलमा रियल बेटिसले इन्जुरी समयमा बराबरी गोल गर्दै खेल १–१ मा टुंग्यायो।

अब रियल लिग लिडर बार्सिलोनाभन्दा ८ अंकले पछाडि परेको छ। अब यी रियलले पाँच खेल मात्र खेल्न बाँकी छन्। बार्सिलोनासँग अझै एक खेल हातमा छ। उसले शनिबार गेटाफेसँग खेल्नेछ।

खेलको सुरुआत भ्रमणकारी रियलका लागि राम्रो रह्यो। भिनिसियस जुनियरले चार दिनभित्र दोस्रो गोल गरे। फेडेरिको भाल्भेर्डेको टाढाबाट प्रहार गरिएको बललाई बेटिसका गोलकिपर आल्भारो भायेसले मात्र रोक्न सके। तर, पूर्ण रूपमा नियन्त्रण गर्न नसकेपछि ब्राजिलियन फरवार्डले रिबाउन्डमा सजिलै गोल गरे।

तर, बेटिस डराएन। थिबाउट कोर्टुआ घाइते भएकाले उनको स्थानमा खेलेका एन्द्रिय लुनिनले कम्तीमा दुई उत्कृष्ट बचाउ गर्दै आफ्नो टोलीलाई खेलमा राखे। अर्कोतर्फ, किलियन एमबाप्पेको गोल अफसाइडका कारण रद्द भयो। यसले ट्रेन्ट अलेक्जान्डर–अर्नोल्डको उत्कृष्ट पासलाई व्यर्थ बनायो।

बेटिसले बराबरीका लागि निरन्तर दबाब बनाइरह्यो। अन्ततः अन्तिम क्षणमा सफलता पायो। फेर्लान्ड मेन्डी लडेपछि फाउलको अपिल गरे पनि रेफ्रीले खेल जारी राखे र पूर्वआर्सनल डिफेन्डर हेक्टर बेलेरिनले भीडभाड भएको पेनाल्टी क्षेत्रबाट बल जालीमा पठाए। यसले एस्टादियो ला कार्टुजामा उपस्थित ५४ हजार दर्शकलाई खुसी बनायो।

योसँगै रियल सबै प्रतियोगितामा पछिल्ला ६ मध्ये ५ खेल जित्न असफल भएको छ। उता बेटिस पाँचौं स्थानमा रहेको छ। गेटाफेभन्दा ६ अंकले अगाडि र एट्लेटिको मड्रिडभन्दा ७ अंकले पछाडि छ।