धमलाले आइटीएफको वर्ल्ड च्याम्पियनसिप खेलाउने 

काठमाडौं । अन्जन धमलाले आइटीएफ तेक्वान्दोको वर्ल्ड च्याम्पियनसिप खेलाउने भएका छन् । आइटीएफको अम्पायर कमिटीले धमलालाई काजकिस्तानमा हुने वर्ल्ड च्याम्पियनसिपमा अम्पायर चयन गरेको हो । 

प्रतियोगिता काजकिस्तानको अस्टानामा आईतबारदेखि अगष्ट २७ गतेसम्म सञ्चालन हुदैछ । वर्ल्ड च्याम्पियनसिप खेल्न नेपालबाट चार खेलाडी सहितको नेपाली टिम काजकिस्तानमा छन् । आइटीएफ तेक्वान्दोको सबैभन्दा ठुलो प्रतियोगिता वर्ल्ड च्याम्पियनसिप काजकिस्तानमा सुरु भएको छ । 

"वर्ल्ड च्याम्पियनसिप आइटीएफको सबैभन्दा ठुलो प्रतियोगिता हो । प्रतियोगितामा अम्पायरको भुमिका निर्वाह गर्न पाउनु खेल जिवनकै ठुलो उपलब्धिको रुपमा लिएको छु ।" धमलाले भने ।

आइटीएफ तेक्वान्दोका वर्ल्ड च्याम्पियनसिपमा विश्वका ९३ बढी देशका ९ सय बढी खेलाडी सहभागी हुदैछन् । 

धमला आइटीएफका ए क्लास अम्पायर हुन् । आइटीएफका छैटौं डान समेत रहेका धमला आइटीएफ दक्षिण एसियाका उपाध्यक्ष र एसियाका कार्यसमिति सदस्य हुन् । 

राष्ट्रिय खेलकुद परिषद् राखेपका बोर्ड सदस्य समेत रहेका धमला नेपाल आइटीएफ तेक्वान्दो संघका पूर्व अध्यक्ष समेत हुन् । 

आइटीएफको वर्ल्ड च्याम्पियनसिपमा नेपालबाट महिलातर्फ ४७ केजीमा रुबिका खड्का, ५२ केजीमा सुस्मिता थापा तथा पुरुषतर्फ ६४ केजीमा पुकार केसी र ६८ केजीमा अजय बुढामगरले प्रतिस्पर्धा गर्दैछन् ।