निर्णायक खेलमा चम्किएका भिनिसियस
काठमाडौं। म्यानचेस्टर सिटीले च्याम्पियन्स लिगमा घरेलु मैदानमा भएको दोस्रो लेगमा ‘कमब्याक’ गर्ने अपेक्षा गरिएको थियो। तर, समग्रमा ५–१ को हारसहित सिटीले प्रतियोगिताबाट बाहिरिएको छ।
ब्राजिलियन फरवार्ड भिनिसियस जुनियरको दुई गोलको मद्दतमा रियल मड्रिडले सानदार जित निकाल्दै समग्रमा ५–१ को अग्रतासहित क्वार्टरफाइनलमा स्थान पक्का गरेको हो।
मंगलबार भएको खेलमा रियलले सिटीलाई २–१ ले पराजित गर्यो। सिटीका लागि एकमात्र गोल एर्लिङ हालान्डले गरेका थिए। इतिहाद स्टेडियममा खेल सुरु भएदेखि नै रियलले आक्रामक खेल प्रदर्शन गर्यो।
खेलको २२औं मिनेटमा पेनाल्टीमार्फत भिनिसियसले टोलीलाई अग्रता दिलाए। उनको प्रहारलाई गोललाइनमा हातले रोक्दा बर्नार्डो सिल्भाले रातो कार्ड पाए र सिटी १० खेलाडीमा सीमित भयो।
तर, दबाबबीच पनि ४१औं मिनेटमा जेरमी डोकुको पासमा हालान्डले गोल गर्दै सिटीलाई बराबरीमा ल्याए।
दोस्रो हाफमा रियलको नियन्त्रण
पहिलो लेगमा ३–० को अग्रता लिएको रियललाई खेल नियन्त्रणमा राख्न सहज भयो। दोस्रो हाफमा दुवै टोलीका केही गोल अफसाइड र फाउलका कारण रद्द भए।
७०औं मिनेटमा ब्राहिम डियाजको स्थानमा घाइतेबाट फर्किएका किलियन एम्बाप्पेलाई मैदानमा उतारियो। तर, उनले अवसर सदुपयोग गर्न सकेनन्।
इन्जुरी समयको अन्तिम क्षणमा अउरेलियन चुआमेनीको पासमा भिनिसियसले भली प्रहार गर्दै आफ्नो दोस्रो गोल गरे र रियलको जित सुनिश्चित गरे। सिटीले पेनाल्टीको दाबी गरे पनि रेफ्रीले अस्वीकार गरे भने भिएआरले पनि हस्तक्षेप गरेन।
यससँगै १५ पटकको च्याम्पियन रियलले लगातार तेस्रो सिजन सिटीलाई पराजित गर्दै युरोपेली श्रेष्ठताको यात्रामा अर्को कदम अगाडि बढाएको छ। अर्कोतर्फ सिटी अब लिग कप फाइनलतर्फ ध्यान केन्द्रित गर्ने अवस्थामा पुगेको छ।
