नेपालको मुस्किलको जित

काठमाडौं। सम्झना खड्काको सानदार ब्याटिङसँगै नेपालले आईसीसी महिला टी–२० आई च्यालेन्ज ट्रफीमा लगातार दोस्रो जित निकालेको छ।

बुधबार सम्पन्न खेलमा नेपालले घरेलु टोली रुवान्डालाई २ विकेटले पराजित गरेको हो।

जितसँगै नेपालले ३ खेलबाट ४ अंक जोडेको छ। रुवान्डाको पनि समान खेलबाट समान अंक छ। रुवान्डाले दिएको ८९ रनको लक्ष्य नेपालले २ बल बाँकी रहँदा ८ विकेट गुमाएर पूरा गर्‍यो।

नेपाली ओपनर सम्झनाले सर्वाधिक ४८ रन बनाइन्। ४२ बल खेलेकी उनले ७ चौका प्रहार गरिन्। पूजा महतोले १३ रन बनाउँदा अन्यले राम्रो प्रदर्शन गर्न सकेनन्।

रुवान्डाकी जियोभानिस उवासेले सर्वाधिक ३ विकेट लिइन्। गिसेल इशिम्वे २ विकेट लिइन्।